كبشة هستريا

شعري
والكهربا
امنيه
مره كنت عند تيتا صحيت باليل وطبعا الشقه غريبه وماشيه احسس وكنت بدور علي كوبس النور
وعماله بقي لازقه في الحيطه
لحسن حظي تيتا عندها خشب كده عالحيطه
وكنت انامن خوفي من الضلمه كنت ماسكه فيها اوي
وبدور علي الكوبس..الدنيا كلها نورت ادامي
-قالوي اني صرخت صرخه المتكهربين-
والبيت صحي والجيران صحيت
ولاقتني بقدره قادر في اخر الصاله
اللي يضحك بقي ان شعري كان في وضع زاويه قايمه
ومكانش راضي ينام..
اتاريهم صحيو مخضوضين من شكلي
ومن ساعتها وشعري ضعيف ومبيطولش
بس انكتبلي عمر جديد

*****

فن الطهى
سارة
كان فى يوم العصر البيت كله كان نايم
حبيت اعمل ليهم مفاجئة
جبت الدقيق والبيض
وبدات اعمل بلح الشام
وكان منظر العجين جميل اوى
وبدات احط قطع العجين فى الزيت على النار
لم يمر اكثر من نص دقيقة وقطعة العجين تحمر وتنفجر
وتخبط فى صقف المطبخ واحدة ورا التانية
بشكل مرعب صرخت والبيت كله صحى متعجب
من المفرقعات اللى خبزتها ومن يومها
حرمت اعمل مفاجئات تانى

*****

الرخصة
حجازى
مرة كنت زهقان قوى فنزلت اسمع الكاست فى العربية
فقولت لما اخود بالعربية لفة كدة
المهم لقيت العربية بتاعت البوليس دة ماشية
و لقيت واحد بيقول العربية السودة القدام دة تركن على جنب
انا طبعا كنت حمووت من الخوف المهم ركنت
و نزلت و المشكلة انى كنت لابس شورت قصير جدا (ميوووة)
و تشرت كت لقيت الضابط بيقولى
رخصتك و رخصت العربية
و انا ممعيش اى حاجة
قلى طب اتفضل معايا و سحب العربية
و اخدنى عالقسم المهم دخلت القسم
و انا لابس الشورت و قاعد مع المجرمين
لحد ما جة بابا ودفع الغرامة و اخدنى
و طبعا اخدت علقة تمام و من ساعتها
مركبتش عربيتنا ولا مرة ولا حتة مع بابا

*****